מנחם נחום טווערסקי (בני ברק)
| רבי מנחם נחום טווערסקי | ||
|---|---|---|
| טשערנאבילער רבי | ||
| געבורט | כ"ב שבט תש"ב ירושלים | |
| חסידות | טשערנאבל | |
| פירערשאפט | ה'תשמ"ח - | |
| הויף ארט | בני ברק, ישראל | |
| נומער אין דינאסטיע | 9 | |
| פאריגער | רבי משולם זוסיא טווערסקי | |
| זיינע רביס | רבי אהרן רוקח פון בעלזא | |
| פאטער | רבי משולם זוסיא טווערסקי | |
| מוטער | בלומא טויבא בראנדוויין | |
| ווייב | נחמה מרים היילפרין | |
| קינדער | מלכה ראטטענבערג בת שבע טווערסקי ביילא היילפרין בריינא פריידא טווערסקי מרדכי טווערסקי אהרן טווערסקי דוד טווערסקי אברהם זרח אריה יהודה לייבוש טווערסקי רעכיל דבורה ראטטענבערג אסתר מינדל טווערסקי. | |
רבי מנחם נחום טווערסקי (געב' כ"ב שבט ה'תש"ב) איז דער טשערנאבילער רבי אין בני ברק, מיט עטליכעע הונדערטער חסידים אין ארץ ישראל און איבער דער וועלט.
יונגע יארן
[רעדאַקטירן | רעדאַקטירן קוואַלטעקסט]רבי מנחם נחום איז געבוירן געווארן כ"ב שבט ה'תש"ב אין ירושלים צו זיין פאטער רבי משולם זוסיא טווערסקי, טשערנאבילער רבי און זיין מוטער מרת בלומא טויבא,[1] א טאכטער פון רבי יעקב מרדכי בראנדוויין, דער סטרעטינער רבי אין ירושלים. ער האט געלערנט אין דער בעלזער ישיבה. אין זיינע יונגע יארן פלעגט ער גיין צו די טישן פונעם בעלזער רב, רבי אהרן רוקח.
י"ח אלול ה'תשכ"א, האט ער חתונה געהאט מיט מרת נחמה מרים, א טאכטער פון גאב"ד ראדאמישלא הרב אלחנן היילפרין זצ"ל, דער געוועזענער זקן הרבנים פון גאלדערס גרין, לאנדאן, און נשיא הכבוד פונעם לאנדאנער התאחדות קהלות החרדים.
נאך זיין חתונה פלעגט ער לערנען אין דעם בעלזער כולל פאר אומגעפער פינף און צוואנציג יאר, און דערנאך, האט זיין פאטער באשטימט אים צו ווערן ראש כולל אין טשערנאביל.
רביסטעווע
[רעדאַקטירן | רעדאַקטירן קוואַלטעקסט]ווען זיין פאטער רבי משולם זוסיא איז נפטר געווארן י"ז מרחשון ה'תשמ"ח, האט ער איבערגעלאזט א צוואה אז אלע זיינע זין זאלן פירן רעביסטעוועס. דער רחמיסטריווקער רבי, האדמו"ר רבי ישראל מרדכי האט באקרוינט רבי מנחם נחום צו ווערן א רבי.
ר' מנחם נחום האט געעפנט א ישיבה קטנה און א ישיבה גדולה אין בני ברק, און זיי ווערן גערעכנט פון די בעסטע חסידישע ישיבות אין ישראל.[פֿעלט אַ מקור]
אין זיינע יארן האט מען געעפנט טשערנאבלער שטיבלעך אין ירושלים, בית שמש, ביתר, נוף הגליל, צפת און אלעד אין ארץ ישראל, אין אנטווערפן, בעלגיע און אין לאנדאן און מאנטשעסטער אין ענגלאנד. זיין ברודער, רבי ישעיה טווערסקי, פירט א טשערנאבלער הויף אין בארא פארק, ניו יארק. שפעטער האט זיין ברודער רבי אברהם יהושע העשיל אנגעהויבן פירן אין אשדוד.
רבי מנחם נחום האט באשטימט זיין ברודער רבי יעקב מרדכי אלס רבי פון די טשערנאבלער חסידים אין אלעד. ער האט אנגעמוטיקט זיין ברודער רבי חיים יצחק צו עפענען א שטיבל אין 21סטער עוועניו אין בארא פארק (היינט הייסט עס דער לאיעווער בית מדרש), און דער רבי שיקט דארטן זיינע חסידים.
דער גערער רבי, הרה"ק רבי פנחס מנחם אלטער (דער "פני מנחם") זצ"ל האט אויף אים מעיד געווען אז ער קען פועל'ן ישועות.[2]
דער רבי מישט זיך נישט אריין אין קיין פאליטיק און נעמט נישט סיי וועלכע זייט אין קיין שום מחלוקות.
משפחה
[רעדאַקטירן | רעדאַקטירן קוואַלטעקסט]רבי מנחם נחום האט געהייראט מרת נחמה מרים היילפרין פון לאנדאן. זייערע קינדער:
- מרת מלכה ווייב פון הרב יעקב אלעזר ראטנבערג, זון פון רבי משולם פון קאסאן.
- מרת בת-שבע, ווייב פון רבי מרדכי (זון פון זיין ברודער רבי ישעיה טווערסקי, טשערנאבלער רבי אין בארא פארק)
- מרת ביילא, ווייב פון הרב נפתלי צבי היילפרין, זון פון זיין שוואגער הרב יצחק אריה לייב היילפרין פון רמות, ירושלים
- מרת בריינא פריידא, ווייב פון רבי מרדכי (זון פון זיין ברודער רבי חיים יצחק, לאיעווער רבי אין בארא פארק)
- רבי מרדכי, איידעם ביי רבי חי יצחק טווערסקי פון רחמיסטריווקא אין אמעריקע.
- רבי אהרן, איידעם פון רבי מרדכי טווערסקי (זון פון רבי חי יצחק, רחמיסטריווקער רבי אין אמעריקע)
- רבי דוד, האט געהייראט מרת שרה חנה רחל, טאכטער פון רבי מנחם מענדיל האגער, וויזשניצער רבי אין דעם וויזשניצער שטעטל אין קייאמישע לייק.
- רבי אברהם, האט געהייראט מרת ברכה, טאכטער פון רבי יצחק יוחנן האגער, וויזשניצער רבי פון וויליאמסבורג (זון פון רבי מאטעלע פון מאנסי)
- מרת רעכיל דבורה ווייב פון הרב חיים מאיר ראטטענבערג, זון פון ר' יהוסף בנציון ראטנבערג, רב פון דער קאסאנער קהילה אין בארא פארק, (זון פון רבי משולם פון קאסאן, און איידעם פון רבי מרדכי האגער, דער פריערדיגער וויזשניצער רבי פון מאנסי).
- מרת אסתר מינדל, ווייב פון הרב חיים מאיר טווערסקי, זון פון רבי נחמן יוסף (זון פון רבי וועלוועל טווערסקי, און איידעם פון רבי מרדכי האגער, דער פריערדיגער וויזשניצער רבי פון מאנסי).