יצחק לעבאוויטש

פֿון װיקיפּעדיע
שפּרינג צו: נאַוויגאַציע, זוך

רבי יצחק לעבאוויטש (געבוירן ה'תש"ז), באקאנט אלס דער וואודרידזשער רב, איז דער רב און גרינדער פון קהל יראים וואודרידזש, ניו יארק.

לעבנסגעשיכטע[רעדאַקטירן | רעדאקטירן קוואַלטעקסט]

רבי יצחק איז געבוירן געווארן אין יאר ה'תש"ז אין מישקאלץ, אונגארן, דאס עלטסטע קינד צו זיינע עלטערן רבי שלמה און מרת ברכה, טאכטער פון רבי יצחק עהרנפעלד הי"ד פון זענטא בעל נחלת יצחק. רבי שלמה איז געווען פון די באוואוסטע גאר גרויסע תלמידי חכמים אין וויליאמסבורג, א זון פון רבי עקיבא צבי ז"ל פון בעלעד, אונגארן.‏[1]

אין סיון ה'תש"ט איז רבי שלמה געקומען קיין אמעריקע מיט זיין משפחה וואס האט זיך באזעצט אין וויליאמסבורג, ברוקלין.

רבי יצחק איז געווען באוואוסט אלס א וואונדער קינד און אן עילוי צוליב זיין שארפן קאפ. ער איז געווען פון די ערשטע צען תלמידים אין דער סאטמארער תלמוד תורה "תורה ויראה" אין וויליאמסבורג. ביי די צוועלף יאר איז ער געגאנגען לערנען צום קראסנער רב, רבי הלל ליכטנשטיין, פאר צוויי יאר, און דערנאך איז ער געגאנגען לערנען ביים קיוויאשדער רב, רבי אלעזר שפירא זצ"ל. ביי די זעכצן יאר איז ער געגאנגען לערנען ביים סאטמארער רבי, רבי יואל טייטלבוים, און האט געלערנט ביי אים ביז צו דער חתונה.

ער האט חתונה געהאט מיט מרת ציפרעל, א טאכטער פון רבי נפתלי ליכטנשטיין, בן רבי אברהם הי"ד אב״ד סאמאש-אויוואר, וואס איז געווען א זוהן פון די קראסנע רב רבי ברוך בענדיט ליכטענשטיין.

רבנות[רעדאַקטירן | רעדאקטירן קוואַלטעקסט]

ער איז א גאון אדיר בכל מכמני התורה, ער האט אסאך אנהענגערס און תלמידים.

ער לערנט פאר יעדן טאג א שיעור אויף דער טעלפאן ליניע קול הלשון, חוץ פון די שיעורים און דרשות וואס ער גיט אין בית המדרש יעדן שבת, יום טוב, און יומא דפגרא.

ער איז א נאנטער תלמיד און א סאך מקבל געווען פון רבי יואל מסאטמאר זצ"ל, רבי אלעזר שפירא מקיוויאשד זצ"ל און זיין פעטער הרה"ק רבי הלל ליכטענשטיין מקראסנא זצ"ל, ווי אויך פון רבי שמעון ישראל פאזען משאפראן זצ"ל.

ער איז שטארק דבוק אין די תורות און חיבורים און מנהגים פון דעם מונקאטשער רב, דער בעל מנחת אלעזר זצ"ל און אויך פונעם חת"ם סופר זצ"ל.

ער איז אלס אינגערמאן נאך דער חתונה געווען א מגיד שיעור אין דער סאטמארער ישיבה תורה ויראה ער איז געווען דער אינגסטער ר"מ בחייו פונעם סאטמאר רב, רבי יואל זי"ע.

בערך אין יאר ה'תשל"ד האט ער געגרינדעט זיין ישיבה ישרש יעקב אין זיין בית המדרש אויף ראטלעדזש סטריט אין וויליאמסבורג (היינט קאראד'ער ביהמ"ד) אבער ער האט אייביג שטארק געוואלט מקיים זיין וואס עס שטייט אין פרקי אבות ״הוה גולה למקום תורה״ צו לערנען תורה מיט די בחורים אוועק פון די געמיינע שטאטישע גאסן אויף א רואיגן ארט.

אין יאר ה'תשל"ו האט ער זיך אריבער געצויגן מיט דער ישיבה קיין וויינלאנד ניו דזשערזי פאר איין יאר, אבער לא אסתייעא מילתא (ס'האט זיך נישט אויסגעארבעט) און צוליב דעם וואס עס איז געווען א געדינגענער פלאץ און דער בעל הבית האט נישט געוואלט באנייען דעם קאנטראקט, האט מען זיך געמוזט צוריקציען קיין וויליאמסבורג.

וואודרידזש[רעדאַקטירן | רעדאקטירן קוואַלטעקסט]

אין יאר ה'תשמ"ה האט ער מיט דער הילף און עסקנות פון יצחק אייזיק קעפעטש פון מאנסי, זיך געצויגן קיין וואודרידזש אינאיינעם מיט דער ישיבה.

אין יאר ה'תשנ"ח האט מען מיט דער הילף און באשטייערונגען פון עטליכע תומכים אויפגעבויט דעם נייעם פראכטפולן בית המדרש הגדול.

דער אלטער בית המדרש דינט היינט צוטאגס אלס א פריוואטער ספרים צימער פארן רב.

דער בית המדרש הגדול ד'קהל יראים וואודרידזש פארמאגט היינט צוטאגס מניינים פון שחרית, מנחה און מעריב יעדן טאג.

שבת איז פאראן אין דער שטאט וואודרידזש דריי מנינים ווי פאלגנד: קהל יראים וואודרידזש, די מאדערנע שטאטישע שול (Woodridge Town Shul), טאבאקס האטעל, און אויב מאכט זיך אז איינער האט נישט קיין מנין קומט מען אין וואודרידזשער בית המדרש דקהל יראים וואו מען איז פארזיכערט מיט א גרויס מנין.

"א שבת אין וואודרידזש"

יעדן שבת און ספעציעל יום טוב קומט צו פארן א ספעציעל גרויסער ציבור תלמידים און חסידים און סתם אידן הצמאים לדבר השם מיטצוהאלטן די ווארעמע תפילות וואס דער רב דאווענט פארן עמוד, און די הערליכע תורה און דרשות וואס ער גיבט איבער אזוי ווי ער האט דאס מקבל געווען פון זיינע רבי'ס, אן קיין שום טוישונגען.

א שבת מיטן וואודרידזשער רב איז אויסגערופן מיט דער התרוממות הנפש אנגעהויבן ערב שבת פאר מנחה ווען ער זאגט שיר השירים הויך אויפן קול, און שפעטער צו קבלת שבת גייט דער רב צום עמוד, וואו ער הייבט אויף די מתפללים אריין אינעם הייליגן שבת,

ביינאכט נאך דער סעודה קומען זיך צוזאם די געסט און די תלמידים ביים רב אינדערהיים ווי מען זינגט זמירות מיט א דערהויבנקייט, און נאכן זינגען זאגט ער א טיפן לומדישן פלפול און דערנאך הייבט ער אן צו דערציילן סיפורי צדיקים און פארשידענע אינטערעסאנטע געשיכטעס איבער דער הערליכע היסטאריע פון כלל ישראל.

שבת אינדערפרי דאווענט ער פארן עמוד פון אנהייב דאווענען ביז שמונה עשרה, נאך מוסף צו אנעים זמירות גייט ער צוריק צום עמוד און ער זאגט דאס אליין פאר.

און די וואכן צווישן פסח און ראש השנה לערנט ער פאר יעדע וואך שבת נאכמיטאג א הערליכן שיעור אין פרקי אבות וואס איז פיל מיט מוסר, דארט גיט ער אויך איבער וויאזוי א איד דארף זיך אויפפירן אזוי ווי ער האט מקבל געווען פון זיינע רבי'ס.

דער הויכפונקט פונעם שבת איז ביי שלוש סעודות בעת רעוא דרעווין וואס מען פראוועט אין דער טונקל מיט גרויס התעוררות און דערהויבנקייט. נאכן זינגען די ווארעמע זמירות און השם מלך, טרעט ער אויף מיט דברי תורה, וואו איז ער מחזק דעם עולם בתורה ובתפילה און איז מעורר אויף אידישע קינדער זאלן זיך דערנעטערן צו אונזער טאטן אין הימל. שלש סעודות קומען יעדע וואך צופארן אסאך אידן פון ארומיגע געגענטער.

משפחה[רעדאַקטירן | רעדאקטירן קוואַלטעקסט]

רבי יצחק און זיין רעביצין ציפרעל האבן אכט קינדער:

  • רבי יעקב משה פון מאנסי, ראש ישיבת בית הלל, איידעם ביי רבי אליעזר חיים בלום, קאשויער רבי.
  • רבי אהרן פון מאנסי, איידעם ביי רבי אליעזר דוד פאל זצ"ל בעל חשב האפוד.
  • רבי יהושע ברוך בענדיט פון קרית קאשוי, בעדפארד הילס, איידעם ביי רבי שלמה אליעזר מייזעלס, ריטשוואהלער רב.
  • רבי שלמה פון מאנסי, איידעם ביי רבי עקיבא דוד בלום
  • רעביצין פון רבי חיים דניאל ווייס פון מאנרא
  • רעביצין פון רבי אברהם עזיאל טענענבוים פון מאנרא
  • רעביצין פון רבי יצחק שלום פריעדמאן, מאנרא
  • רעביצין פון רבי יחזקאל גרינפעלד פון בארא פארק, ברוקלין

רעפערענצן[רעדאַקטירן | רעדאקטירן קוואַלטעקסט]

  1. רבי עקיבא צבי האט געלערנט תורה מיט ארימקייט א גאנץ לעבן; ער איז געווען אין בעלעד דער מלמד תינוקות ווי אויך פלעגט ער געבן דרשות התעוררות אין די הייליגע טעג. ווען דער רב איז נישט געווען אינדערהיים פלעגט ער פסקנען שאלות