ישראל צבי יאיר דאנציגער

רבי ישראל צבי יאיר דאנציגער
אלעקסאנדער רבי
דער אלעקסאנדער רבי מיט זיין זון (רעכטס פון אים)
געבורט	ה'תש"ה ירושלים
חסידות	אלעקסאנדער
פירערשאפט	ה'תשס"ה -
הויף ארט	בני ברק
נומער אין דינאסטיע	7
פאריגער	אברהם מנחם דאנציגער
פאטער	אברהם מנחם דאנציגער
מוטער	אסתר לאה היילפרין
ווייב	אסתר בערגמאן
קינדער	פערל קליין (נפטר געווארן) אליעזר יצחק דאנציגער מלכה קליין רחל שוחט צביה פלינטנשטיין יחיאל יהודה משה דאנציגער רבקה גאלדמאן

רבי ישראל צבי יאיר דאנציגער (געבוירן ג' חשוון ה'תש"ה, 1945) איז דער היינטיגער אלעקסאנדער רבי, און דער זיבעטער אין דער דינאסטיע.

לעבענסגעשיכטע

ער איז געבוירן געווארן אין ירושלים אין יאר ה'תש"ה דאס עלטסטע קינד צו זיין פאטער רבי אברהם מנחם דאנציגער, בעל "אמרי מנחם" ,און צו זיין מוטער מרת אסתר לאה היילפערין, אן אפשטאמלינג פונעם בעל התניא. אין זיינע קינדערישע יארן האט ער געלערנט אין דעם עץ חיים חדר אין ירושלים. אין זיינע ערשטע בחור'ישע יארן האט ער געלערנט אין דער וויזשניצער תלמוד תורה, און שפעטער איז ער אריבערגעגאנגען לערנען אין "בית מאיר" ישיבה און דערנאך אין דער סלאבאדקער ישיבה אין בני ברק.

ווען עס איז געקומען די צייט האט ער חתונה געהאט מיט מרת אסתר, טאכטער פון רבי משה בערגמאן, דער גרינדער פון ישיבת הרשב"י. נאך דער חתונה האט ער געלערנט אין בראסלעווער כולל, און פלעגט אויכעט אקטיווליך אנטייל נעמען אין דעם שיעור פון ספרי מוהר"ן. שפעטער האט ער געלערנט אין כולל חזון איש.

ער איז באוויסט אלס גאר א גרויסער תלמיד חכם און אן הייליגער מאן.

ער האט איבערגענומען די שרביט הנהגה נאך די פטירה פון זיין פאטער אין יאר ה'תשס"ה לויט דער צוואה. זיינע דברי תורה וועלכע ווערן געשריבן דורך די צוהערערס קומען ארויס וועכענט'ליך.

צוזאמען אינאיינעם מיט זיין פאטער און זיידע האבן זיי אויפגעראכטן און אויפגעשטעלט דעם אלעקסאנדערער הויף פונדאסניי נאך דעם שוידערליכן חורבן אייראפע. זיי האבן אויכעט געגרינדעט א ישיבה, "בית ישראל ותפארת מנחם", און רבי ישראל צבי יאיר איז געווען איינער פון די הויפט אנפירערס פון דער ישיבה.

דערצו איז פארהאנען שטיבלעך פונעם הויף אין ירושלים, ביתר עלית, מודיעין עילית, עמנואל, בארא פארק, לייקוואוד, אנטווערפן, ציריך, סטאמפארד היל און גאלדערס גרין אין לאנדאן.

זיין פעטער (זיין מאמע'ס ברודער) רבי שמואל אלעזר היילפרין איז דער ראש ישיבה פון דער חב"ד'סקער ישיבה "תורת אמת", און אלס בחור און יונגערמאן פלעגט רבי ישראל צבי יאיר זיין אנגעקניפט צו אים זייער שטארק. זיין שוואגער איז רבי מאיר צבי בערגמאן, דער איידעם פונעם ליטווישן פוסק אליעזר מנחם מן שך.

קינדער

• מרת רחל, ווייב פון רבי יוחנן שוחט, דער לוצקער רבי.
• רבי אליעזר יצחק, איידעם פון רבי נתנאל סאפרין, דער קאמארנא רבי.
• מרת פערל איז נפטר געווארן אין אירע יונגע יארן. זי איז געווען די ווייב פונעם אונגווארער רב, רבי עמרם קליין, וועלכער האט געהייראט נאך איר פטירה איר יונגערע שוועסטער. זי האט איבערגעלאזט צוויי זין: הרב יחיאל דוד, דער איידעם פון רבי יוסף דוד טייטלבוים, סאסעווער רבי, און הרב אליעזר זאב.
• מרת מלכה, האט חתונה געהאט מיט איר שוואגער דער אונגווארער רב, רבי עמרם קליין נאך איר שוועסטער'ס פטירה.
• מרת צביה, ווייב פון יעקב פלינטנשטיין, זון פון רבי יצחק מאיר, דער קאפיטשניצער רבי.
• רבי יחיאל יהודה משה, דער רב פון זיין פאטער'ס חסידים אין מודיעין עילית. ער איז אן איידעם ביי רבי עמרם געשטעטנער, רב פון דער אגודת ישראל געגנט אין בני ברק, און ראש ישיבה פון "פנים מאירות".
• מרת רבקה, ווייב פון רבי יעקב גאלדמאן, זון פון רבי גדליה משה (דער צווייטער) פון זוועהיל.