חיים וואזנער

ר' חיים מאיר הלוי וואזנער (געב' תרצ"ט) האט געדינט אלס רב פון דער סאטמארער קהילה אין לאנדאן במשך אכצן יאר. היינט איז ער דער רב פון זכרון מאיר אין בני ברק און ראש ישיבה פון "ישיבת חכמי לובלין".

ביאגראפיע

ר' חיים איז געבוירן געווארן אין פרעשבורג, טשעכאסלאוואקיי, אין תרצ"ט, דער עלצטער זון פון הרב שמואל וואזנער אין בני ברק, מחבר פון "שבט הלוי". ער איז געבליבן אין אייראפע ווען זיינע עלטערן זענען געקומען קיין ארץ ישראל. ערשט נאך דער מלחמה איז ער געווארן פאראייניגט מיט זיינע עלטערן.

נאך זיין חתונה איז ער געווארן א מגיד שיעור אין "ישיבת חכמי לובלין" אין בני ברק.

רבנות

אין תשנ"ב איז ער געקומען קיין לאנדאן צו ווערן רב פון די סאטמארער חסידים אין לאנדאן, ער האט איבערגענומען דאס רבנות פון הר"ר נתן יוסף מייזעלס ,וואס האט דעמאלטס פארלאזט לאנדאן און געפארן וואוינען אין מאנסי. אויך האט ער געפירט א בית דין פאר דיני תורות אונטער דער לאנדאנער חרדישער קהילה.

ער האט געדינט אין לאנדאן ביז תמוז תשס"ט, ווען ער איז געפארן ארויסהעלפן זיין טאטן דעם שבט הלוי אין בני ברק, צוליב זיין הויכן עלטער. נאך זיין פאטער'ס פטירה אין תשע"ה האט מען אים באשטימט ממלא מקום.

פאמיליע

זיינע קינדער זענען:

• הרב יוסף בנימין וואזנער (עלצטער זון) פון אלעד און מגיד שיעור אין ישיבת חכמי לובלין, בני ברק, געשטעלט געווארן תמוז תש"ע אלס רב פונעם סאטמארער שטיבל "ייטב לב" אין קלאפטאן קאמאן, לאנדאן
• די ווייב פון הרב שרגא פייוויש האגער, קאסאווער רבי אין בארא פארק, ניו יארק. און ער דינט אויך אלס דיין אין וויזניץ מאנסי אין בארא פארק
• די ווייב פון הרב מרדכי געלבער, מו"צ אין דער מונקאטשער קהילה פון בני ברק
• הרב מרדכי זאב וואזנער, רב פון קהל מחזה אברהם אין ניו יארק