חיים מאיר האגער

חיים מאיר האגער

געבורט	1887 וויזשניץ, עסטרייך אונגארישע אימפעריע
טויט	1972 (אלט 85 בערך) בני ברק, ישראל
מדינה	עסטרייך אונגארישע אימפעריע, קעניגרייך פון רומעניע, ישראל
פאך	רב

חיים מאיר האגער
וויזשניצער רבי
הרב חיים מאיר האגער
עיקר חיבור	אמרי חיים
געבורט	ט"ו כסלו תרמ"ח וויזשניץ
פטירה	ט' ניסן תשל"ב
קבורה ארט	בני ברק
חסידות	וויזשניץ
הויף ארט	בני ברק
נומער אין דינאסטיע	4
פאריגער	רבי ישראל האגער
נאכפאלגער	רבי משה יהושע האגער רבי מרדכי האגער
פאטער	רבי ישראל האגער
מוטער	הינדא הורוויץ
ווייב	מרגלית טווערסקי
קינדער	משה יהושע האגער מרדכי האגער חנה מרים סימא ווייס הינדא אדלער שבע ברכה ערנסטער צפורה פרידמאן

דער ארטיקל דיסקוטירט דעם פריערדיגן וויזשניצער רבי. טאמער זוכט איר אן אנדער באדייטונג, זעט חיים מאיר האגער (באדייטן).

רבי חיים מאיר האגער זצ"ל (ט"ו כסלו ה'תרמ"ח - ט' ניסן ה'תשל"ב), דער פערטער וויזשניצער רבי, איז באקאנט מיט דעם נאמען "דער אמרי חיים".

אפשטאם

רבי חיים מאיר איז געבוירן אין וויזשניץ ט"ו כסלו ה'תרמ"ח, צו זיין פאטער הרב ישראל האגער, פון וויזשניץ, "דער אהבת ישראל", א זון פון הרב ברוך האגער, פון וויזשניץ, "דער אמרי ברוך", א זון פון הרב מנחם מענדיל האגער פון וויזשניץ, באקאנט אלס "דער צמח צדיק", א זון פון הרב חיים האגער פון קאסאוו, "דער תורת חיים", א זון פון הרב מנחם מענדיל האגער, פון קאסאוו, "דער אהבת שלום". און צו זיין מוטער מרת מרת הינדא א טאכטער פון הרב מאיר הורוויץ, פון דזשיקאוו, "דער אמרי נועם", א זון פון הרב אליעזר הורוויץ, רב אין דזשיקאוו, באקאנט אלס "רבי אליעזר'ל דזשיקאווער", א זון פון הרב נפתלי צבי הורוויץ, דער ראפשיצער רב

רבנות

זיין פאטער האט אויף אים געזאגט ער איז א "בעל שם טוב ייד", און ער ווייס נישט פון וואנען ער האט זוכה געווען צו אזא זון.

פון יאר ה'תר"ע איז רבי חיים מאיר געווען רב אין ווילחאוויץ, מאראמאראש, ביז אין יאר ה'תרצ"ו איז ער געווארן ממלא מקום פון זיין פאטער אין גרויסווארדיין.‏

ביי דעם חורבן אייראפע האט מען אים ארויס געשווערט פון געטא אין גרויסווארדיין אריין אין די וועלדער, פון דארט האט מען אים אריבער געשווערט קיין בוקארעסט וואו ער ער איז געבליבן ביז צום באפרייאונג.

נאך דעם חורבן אייראפע אין יאר ה'תש"ו איז רבי חיים מאיר צוריק געפארן קיין גרויסווארדיין, פון דארט האט ער זיך אריבערגעצויגן אין יאר ה'תש"ז קיין אנטווערפן, אין ענדע פון יאר איז ער ארויף קיין ארץ ישראל, און זיך באזעצט אין תל אביב.

רבי חיים מאיר איז געווען דער ערשטער רבי אויף צושטעלן אן אייגן שטעטל, און מיט גרויסע שוועריגקייטן האט ער אויפגעשטעלט דעם שיכון וויזשניץ אין בני ברק.

פון יאר ה'תש"י האט רבי חיים מאיר שוין געוואוינט אין שיכון וויזשניץ און אנגעפירט פון דארט מיט זיין פארצווייגטער ארבעט, ער האט דארט אויפגעשטעלט א געוואלדיגן חסידישן מיליטער, אין וועמען ער האט אריינגעשיינט תורה מיט יידישקייט.

רבי חיים מאיר איז געווען איינער פון די פירערס פונעם ארטאדאקסישן יידנטום אין ארץ ישראל, און איז געווען פון די אנגעזענע פירערס פון אגודת ישראל און א מיטגליד אין דער מועצת גדולי התורה.

זיינע גבאים זענען געווען ר' יצחק דוד רעזמאוויטש און ר' מנחם אליעזר מאזעס.

הסתלקות

רבי חיים מאיר איז נפטר געווארן ערב שבת קודש ט' ניסן ה'תשל"ב, און ער ליגט אין זכרון מאיר בני ברק, אין אהל פון זיין פאטער צוזאמען מיט זיינע ברידער.

פאמיליע

אין יאר ה'תרס"ה האט רבי חיים מאיר געהייראט מרת מרגליא א טאכטער פון הרב זאב (וועלוועל) טווערסקי, פון רחמיסטריווקא, א זון פון הרב יוחנן טווערסקי פון רחמיסטריווקא. זייערע קינדער:

• הרב משה יהושע האגער (געב' י"ג סיון ה'תרע"ו), וויזשניצער רבי אין בני ברק.

• הרב מרדכי האגער, וויזשניצער רבי - מאנסי

• מרת חנה מרים סימא (מאניא) , בזיווג ראשון די ווייב פון הרב יהודה'לע הורוויץ פון דזשיקאוו. בזיווג שני די ווייב פון הרב יהושע גרינוואלד פון חוסט. בזיווג שלישי די ווייב פון הרב יצחק יעקב ווייס, גאב"ד ירושלים.

• מרת הינדא, די ווייב פון הרב נפתלי חיים אדלער.
  • רבי ישראל אליעזר אדלער—רב פון די וויזשניצער חסידים אין רחובות און וויזשניץ-דזשיקאווער רבי‏
  • מרת שיינא רחל (נפטר געווארן כ"ב טבת ה'תשס"ו), ווייב פון רבי שמואל בראזאווסקי, סלאנימער רבי
  • מרת מרים, בזיווג ראשון די ווייב פון הרב משה ווערנער, און בזיווג שני ווייב פון רבי מרדכי חעשין פון קאשוי.
  • רבי מרדכי אדלער, אב"ד "מנחה חדשה" אין בארא פארק (נפטר געווארן ט"ו אב ה'תשמ"ט).
• מרת שבע ברכה (נפ' כ"ו אייר תשס"ט), די ווייב פון הרב משה ערנסטער (כ"ד תשרי תרפ"ה - כ"ו טבת תשע"ג)‏.
  • הרב וועלוול ערנסטער—רב פון קרית מאור חיים, ירושלים
  • הרב מנחם ערנסטער, איידעם ביי זיין פעטער רבי משה יהושע האגער—וויזשניצער ראש ישיבה
  • הרב ישראל ערנסטער, איידעם ביי רבי יוסף קאליש, אמשינאווער רבי אין אמעריקע
  • מרת ריקל גיטל, די ווייב פון רבי ישראל אליעזר אדלער, דזשיקאווער רבי
  • הרב אליעזר ערנסטער, איידעם ביי הרב אברהם דוד הורוויץ אב"ד שטראסבורג—רב פון קרית מאור חיים, צפת
• מרת צפורה, די ווייב פון הרב ישראל שלום יוסף פרידמאן (בן שלום) (נפ׳ ה׳ אייר תשע״ז), אן אייניקל פון הרב משה יהודה לייב פרידמאן פון פאשקאן.

רעפערענצן

פֿריערדיגער: הרה"צ ישראל האגער "אהבת ישראל"

וויזשניצער רבי תרצ"ז - תשל"ב "אמרי חיים"

נאָכפֿאלגער: הרה"צ משה יהושע האגער (בני ברק) הרה"צ מרדכי האגער (מאנסי)