דוד האלבערשטאם (קשאנאוו)
 | |
| געבורט |
1821  |
|---|---|
| טויט |
1894 (אלט 73 בערך) |
| פאך |
רב |
  | |
רבי דוד האלבערשטאם זצ"ל (ה'תקע"ח - כ"ה אלול ה'תרנ"ג) רב אין קשאנאוו, דער צווייטער זון פון דעם דברי חיים. באקאנט אלס "דער קשאנאווער רב".
אפשטאם
[רעדאַקטירן | רעדאַקטירן קוואַלטעקסט]רבי דוד'ל איז געבוירן אין רודניק אין יאר ה'תקע"ח, דער צווייטער זון צו זיין פאטער הרב חיים האלבערשטאם, דער דברי חיים, און צו זיין מוטער מרת רחל פייגא א טאכטער פון הרב ברוך תאומים-פרענקל, דער ברוך טעם. זיין פאטער פלעגט אים רופן "דער הייליגער רב".
רבנות
[רעדאַקטירן | רעדאַקטירן קוואַלטעקסט]פון יונגערהייט איז רבי דוד'ל געזעצן און געלערנט מיט א געוואלדיגע פלייסיקייט, מען האט געזאגט אויף רבי דוד'ל א גוזמא, "ער לערנט פינף און צוואנציג שטונדן א טאג".
רבי דוד'ל האט געלעבט מיט אן אויסערגעווענלעכע מינימאלע פארברויך, און מיט א צוריק געהאלטנקייט פון אלע וועלטלעכע פארגעניגן'ס. זיין עלטערער ברודער דער שינאווער רב האט אים געריפן דער צדיק הדור.
רבי דוד'ל איז געפארן צו רבי צבי הירש פון רימאנאוו, צו דעם סבא קדישא פון ראדאשיץ און נאך צדיקים. רבי דוד'ל איז געווען שטארק באפריינדעט (בידידות) מיט דעם תפארת שלמה פון ראדאמסק.
אין יאר ה'תרי"א האט מען אויפגענומען רבי דוד'ל רב אין קשאנאוו, זיין פאטער דער צאנזער רב איז געקומען צו זיין באקרוינונג. דאס רבנות איז אים נישט אזוי לייכט אנגעקומען, פון איין זייט איז רבי דוד'ל געווען א געוואלדיגער עניו און זייער א ווייכער פון נאטאר, פון די אנדערע זייט האט ער זיינע אויפטראגן דורך געפירט מיט א שטארקע פעסטקייט אן קיין שום נאכגעבן (פשרות).
א שווערן קאמף האבן אנגעפירט קעגן אים די ראדאמסקער חסידים. נאך דעם וואס רבי דוד'ל איז געווארן רב, האט ער אוועק געשטעלט א שליח צבור אויף וועמען מען האט גערעדט אז ער פירט זיך נישט ארנטליך, וועלכער איז געווען פון די ראדאמסקער חסידים. דערפאר האבן זיי שטארק גערודפט רבי דוד'ל און ער האט געמוזט זיך אויסבאהאלטן פון דער שטאט אויף א לענגערער צייט פאר שרעק פון די רעגירונג'ס לייט.
ווידער אמאל יארן שפעטער, אין יאר ה'תרל"ו האט רבי דוד'ל געלייגט א חרם אויף רבי העשע גראס וועלכער איז געווען א פערזענליכקייט און א תלמיד חכם, וויבאלד ער האט פארטיידיגט זיינע קעגנער, די סאדיגורא זייט, און ער האט געמוזט איבער בעטן רבי דוד'ל מיט גרויס שאנדע. מיט פיל אינטערווענירונג האבן רבי דוד'לס גוטע פריינד ערלעדיגט מען זאל אים נישט איינזעצן, און זאל נישט ווידער דארפן אנטלויפן.
דער טריסקער מגיד האט געזאגט אויף אים: "איך האב דאך עפעס געקענט אלטע צדיקים, אבער אזוי מ'זאל האבן אויף זיך דעם צלם אלקים אינגאנצן אזוי ווי מ'האט אים איבערגעגעבן אין דעם סאנזער רב'ס א זון ר' דוד'ל, ער וואוינט דאכט זיך מיר אין קשאנאוו, ער האט דעם גאנצן צלם אלקים".
הסתלקות
[רעדאַקטירן | רעדאַקטירן קוואַלטעקסט]רבי דוד'ל איז נפטר געווארן כ"ה אלול ה'תרנ"ג.
פאמיליע
[רעדאַקטירן | רעדאַקטירן קוואַלטעקסט]רבי דוד'ל האט געהייראט בזיווג ראשון מרת עכסה גיטל א טאכטער פון הרב יוסף זאב פון טארניגראד (ער האט געהאט הענגען העכערן בעט, א גאלדענער טאוול וואס אין אים איז געווען אויסגערעכנט זיין ייחוס), זי איז געווען דער זעקסטער דור פון מרת עכסה די טאכטער פון אריה"ק וועלכע איז געקומען פון ארץ ישראל קיין פוילן. זייערע קינדער:
- הרב יוסף זאב האלבערשטאם (ה'תקצ"ז - כ"ג אלול ה'תרכ"ב), פון קשאנאוו.
- הרב אריה לייביש האלבערשטאם (ה'תקצ"ח - אדר א' ה'תרס"ח), רב אין דוקלא.
בזיווג שני האט רבי דוד'ל געהייראט מרת לאה זיסל צינץ, זי איז געווען אן אייניקל פון יד הקטנה. זייערע קינדער:
- הרב משה האלבערשטאם (ה'ת"ר - ה' אדר ה'תרע"ה), רב אין קשאנאוו.
- הרב נפתלי האלבערשטאם (ה'תר"י - כ"ט תמוז ה'תרפ"ג), רב אין קשאנאוו.
- מרת בריינדיל, די ווייב פון הרב אלעזר ווייסבלום פון ריישא.
- מרת מרים, די ווייב פון הרב יחיאל הורוויץ, רב אין פאקשאווניצא.
- מרת הינדא, די ווייב פון הרב משה יוסף טייטלבוים, רב אין אוהעל.
- די ווייב פון הרב שלום שפירא רב אין פשיטיק, א זון פון הרב יעקב יצחק שפירא פון בלענדאוו, א זון פון הרב חיים מאיר יחיאל שפירא, דער "שרף" פון מאגליניצא.
- מרת שרה גיטל, די ווייב פון הרב שמעון אלטער תאומים-פרענקל, רב אין פאדגארזע.
זעט אויך
[רעדאַקטירן | רעדאַקטירן קוואַלטעקסט]רעפערענצן
[רעדאַקטירן | רעדאַקטירן קוואַלטעקסט]- י"ג אורות - סיפורים דערציילט דורך רבי יענקלי לייזער דער פשעווארסקער רבי - ארויס געגעבן דורך זיין אייניקל הרב יוסף נפתלי וואגשאהל, ה'תשנ"ד
- אנציקלופדיה לחכמי גליציה, מאיר וונדר