אליעזר זאב ראזנבוים

פֿון װיקיפּעדיע
קפיצה לניווט קפיצה לחיפוש
אליעזר זאב ראזנבוים
נאדווארנער רבי
דער רבי ביים פארלערנען א שיעור אין פאנאוועזשער ישיבה
דער רבי ביים פארלערנען א שיעור אין פאנאוועזשער ישיבה
געבורט ה' אב ה'תשי"ז
בני ברק
חסידות נאדווארנא
פירערשאפט ה'תשע"ב -
הויף ארט קרית נאדווארנא, בני ברק
נומער אין דינאסטיע 9 (זעקסטער דור פון רבי מאטאלע נאדווארנער)
פאריגער רבי יעקב ישכר בער ראזנבוים
פאטער רבי יעקב ישכר בער ראזנבוים
מוטער מרת רבקה הערש
ווייב שרה רבקה ווייצנער
קינדער יוכבד ברכה קארנרייך
פרומט רויזא רוקח
מלכה ניישלאס
חיים מרדכי ראזנבוים
יוסף דוד ראזנבוים
חיה רחל הורוויץ
חנה ראטנבערג
זיסל בתיה בידערמאן
מרים גראס
פייגא לאבין
ישראל ראזנבוים

רבי אליעזר זאב ראזנבוים (געב' ה' אב ה'תשי"ז), איז דער היינטיגער נאדווארנער רבי פון בני ברק, און דער עמטליכער ממלא מקום פון זיין פאטער הרה"ק רבי יעקב ישכר בער ראזנבוים

לעבנסגעשיכטע[רעדאַקטירן | רעדאקטירן קוואַלטעקסט]

רבי אליעזר זאב איז געבוירן געווארן אין דער שטאט בני ברק צו זיינע עלטערן רבי יעקב ישכר בער ראזנבוים, דער פריערדיגער נאדווארנער רבי, און צו זיין מוטער מרת רבקה, טאכטער פון רבי משה הערש. ער איז דאס עלטסטע קינד פון א משפחה פון 11 קינדער. אלס קינד איז ער אויפגעצויגן געווארן און באקומען זיין אויסבילדונג אין די מוסדות פונעם נאדווארנער חסידות. אין יאר ה'תשל"ט, האט ער געהייראט מרת שרה רבקה, טאכטער פון רבי אהרן צבי ווייצנער, דער רבי פון פשעמישל אין אמעריקע. פאר א קורצער צייט נאך זיין חתונה איז ער געבליבן וואוינען אין אמעריקע נאענט צו זיין שווער, אזוי ווי דער שטייגער ביי א סאך חסידישע אידן. אנשליסנד איז ער צוריקגעקומען קיין ארץ ישראל אום צו העלפן זיין פאטער מיט דער הנהגה פון דער געמיינדע. נאכטרעגליך האט אים זיין פאטער דער רבי באשטימט אלס רב פון נאדווארנער חסידים אין ארץ ישראל און אויסלאנד, און מיט דער צייט האט ער זיך ערווארבן א נאמען פון אן איינזיכטיגן און א קלוגן מענטש, און פילצאליגע מענטשן האבן אנגעהויבן אנצוקומען צו אים פאר בעראטונג. זיין פאטער דער רבי האט פארבאטן פאר זיינע חסידים זיך ווענדן צו אים אין זיינעם מיטן פריוואטן נאמען, און האט געבעטן אז מ'זאל אים עהרען און רופן אים 'דער רב'.

אום ז' אדר ה'תשע"ב, איז זיין פאטער נפטר געווארן און ווערענד דער לוויה האט מען אים באקרוינט ממלא מקום פון זיין פאטער, און לויט דער צוואה די אנדערע דריי ברידער פון ירושלים, ביתר עילית און אלעד זענען אויך באקרוינט געווארן רביס אין זייערע וואוינערטער.

דאס חסידות אונטער זיין פירערשאפט ציילט אפ אומגעפער 600 משפחות, פון וועלכע 250 משפחות וואוינען אין 'קרית נאדווארנא' געגנט אין בני ברק, וועלכע ווערט באטראכט אלס די הויפטקווארטיר פונעם נאדווארנער חסידות. צוזעצליכע פיליאלען זענען פאראן אין די פאלגנדע פלעצער: ירושלים, ביתר עילית, אלעד, בית שמש, חיפה, קרית גת, מודיעין עילית און קוממיות. די אנשטאלטן פונעם חסידות רעכענען אריין אין זיך: נעץ פון כוללים פאר יונגעלייט איבער דעם גאנצן לאנד, ישיבה גדולה 'מאמר מרדכי', ישיבה קטנה 'תכלת מרדכי' און התאחדות הבחורים וואס ציילן אפ איבער 300 בחורים. צוזעצליך עס זענען פאראן א תלמוד תורה 'תפארת מרדכי' מיט 200 קינדער, א נעץ פון קינדערגארטנס, שטיבלעך און א מקווה. דאס נאדווארנער חסידות פארמאגט אויך חסד ארגאניזאציעס אזוי ווי צום ביישפיל: 'שקל הקודש' וואס טיילט אויס געלט פאר נויטבאדערפטיגע, א פאבריק וואס טייטלט ארום נארונג פאר נויטבאדערפטיגע, גמ"ח 'עזר נישואין' וואס העלפט ארויס משפחות פון די חסידות מיט אויסבארגן געלט כדי אויסצודעקן די גרויסע הוצאות פון חתונה מאכן זייערע קינדער, באקליידונג-פאבריק מיטן נאמען 'לבוש מרדכי' וועלכע טיילט ארויס מלבושים פאר חתנים און נאך. הרב שלמה קאסטליץ איז דער פארטרעטער פונעם נאדווארנער חסידות אין דעם שטאט-ראט פון בני ברק.

רבי אליעזר זאב פירט זיך צו מאכן א תענית דיבור יעדער מאנטאג און דאנערשטאג, ווי אויך פון ראש חודש אלול ביז נאך יום כיפור. ער באשעפטיגט זיך אויכעט מיט קירוב רחוקים, אזוי ווי זיין פאטער פלעגט, און צווישן זיינע אנהענגערס קען מען טרעפן אזעלכע וואס גייען מיט געשטריקטע קאפעלעך, ספרדים, און נאך וואס זענען באצויבערט פון זיין חכמה און ווייזהייט און קומען צו אים כדי צו שעפן קדושה און באקומען ברכות און עצות. קבלת קהל ביים נאדווארנער רבי'ן ענדיגט זיך אין די פרי מארגן שטונדן. זיינע תפילות און טישן ווערן אפגעהאלטן מיט א שטארקער באגייסטערונג און דביקות ווי דער אור-אלטער שטייגער פון נאדווארנא. פילפאכע מענטשן פון פארשידענע שיכטן און קרייזן וואס זענען נישט חסידיש נעמען אנטייל אין זיינע טישן, הויפטזעכליך ליטווישע אידן וואס קומען צו הערן דעם וועכנטליכן שפאנענדן דבר תורה וואס דויערט ארום פערציג מינוט יעדער שבת.

קינדער[רעדאַקטירן | רעדאקטירן קוואַלטעקסט]

  • מרת יוכבד ברכה, ווייב רבי ברוך, זון פון רבי נפתלי ראובן קארנרייך, דער קאסאוו-וויזשניצער רבי, און איידעם פון הרה"ק רבי אליעזר האגער, דער פריערדיגער סערעטער רבי.
  • מרת פרומט רויזא, ווייב פון רבי אברהם, זון פון רבי שלמה רוקח, דער יארעסלאווער רבי פון מודיעין עילית.
  • מרת מלכה, ווייב פון רבי יעקב יוסף, זון פון רבי יודא ניישלאס, אב"ד סערדעהאלי און דומ"צ סקווירא בני-ברק, זון פון רבי משה.
  • רבי חיים מרדכי, האט געהייראט מרת חיה מלכה, טאכטער פון רבי יעקב מנחם ראבינאוויטש, דער ביאלער רבי פון בני ברק.
  • רבי יוסף דוד, האט געהייראט מרת רבקה זלאטא, טאכטער פון רבי חיים שאול טויב, פון מאדזשיץ
  • מרת חיה רחל, ווייב פון רבי יהודה, זון פון רבי דוד הורוויץ פון ראצפערט בראזיל.
  • מרת חנה, ווייב פון רבי יחיאל מיכל, זון פון רבי נפתלי צבי ראטנבערג, רב פון תולדות אהרן אין בית שמש און איידעם פון הרה"ק רבי אברהם יצחק קאהן, דער פריערדיגער תולדות אהרן רבי.
  • מרת זיסל בתיה, ווייב פון רבי ישראל, זון פון רבי אהרן בידערמאן, דער לעלאווער רבי פון בית שמש.
  • מרת מרים, ווייב פון רבי נתן דוד, זון פון רבי ניסן משה גראס, רב ד'קהל חסידים אין קרית ספר, זון פון רבי שלום יודא, דער האלמינער רבי.
  • מרת פייגא, ווייב פון רבי חיים, זון פון רבי יצחק אייזיק לאבין, זידיטשואיווער רבי פון בני ברק.
  • הרב ישראל, א חתן געווארן כסליו ה'תשע"ח מיט דער טאכטער פון רבי איתמר ראזנבוים, זון פון קרעטשענעווער רבי פון רחובות, און איידעם פון רבי נפתלי קארנרייך, דער קאסאוו-וויזשניצער רבי.