אברהם יעקב פרידמאן

דער ארטיקל דיסקוטירט דער זון פונעם הייליגן רוזשינער. אויב איר זוכט אן אנדער באדייטונג, זעט אברהם יעקב פרידמאן (באדייטן).

גראוויור פון רבי אברהם יעקב פון סאדיגורא

רבי אברהם יעקב פרידמאן זצ"ל (כ' חשוון ה'תק"ף - י"א אלול ה'תרמ"ג), פון סאדיגורא. דער צווייטער זון פון דעם רוזשינער.

אפשטאם

רבי אברהם יעקב איז געבוירן כ' חשוון ה'תק"ף, צו זיין פאטער הרב ישראל פרידמאן פון רוזשין, א זון פון הרב שלום שכנא, פון פראהבישטש, א זון פון הרב אברהם המלאך, דער חסד לאברהם, א זון פון הרב דוב בער, דער מעזריטשער מגיד.

רבנות

נאך זיין ברודער רבי שלום יוסף'ס פטירה, י"א אלול ה'תרי"א, איז רבי אברהם יעקב געווארן דער ממלא מקום פון פאטער און ברודער, אלס רבי אין סאדיגורא.

זיין איינפלוס האט געהאט א ווייטן פארנעם, זיינע אנהענגערס האבן זיך געציילט אין טויזנטער, צווישן זיי באקאנטע רבי'ס און רבנים. רבי אברהם יעקב איז געווען דער פרעזידענט (נשיא) פון צדקת רמבה"נ פאר גאנץ רוסלאנד, דורך זיין אינטערווענירונג האט מען אויפגעשטעלט די אלע הייזער פון כולל וואהלין אין ירושלים.

הסתלקות

נאך שבועות ה'תרמ"ג איז רבי אברהם יעקב קראנק געווארן, די דאקטוירים האבן פעסטגעשטעלט אז זיין מאגן איז איינגעטריקנט געווארן פון אזויפיל פאסטן. י"א אלול דער זעלבער טאג וואס זיין עלטערע ברודער איז נפטר געווארן, האט ער געזאגט דברי תורה אויף דעם פיוט "נאפד נקמה סתרו יושר", ער האט געדאוונט זיין לעצטן מעריב, און איז נפטר געווארן י"א אלול ה'תרמ"ג, ער ליגט אין סאדיגורא אין פאטער'ס אוהל.

פאמיליע

רבי אברהם יעקב האט געהייראט אין עלטער פון דרייצען יאר, י"ח סיון ה'תקצ"ג אין פינסק, מרת מרים, א טאכטער פון הרב אהרן פערלאוו, דער בית אהרן, א זון פון הרב אשר פערלאוו פון קארלין-סטאלין. זייערע קינדער:

• הרב אשר פרידמאן, ער איז נפטר געווארן אלץ חתן.

• הרב שלמה פרידמאן (י"א תשרי ה'תר"ד - כ' טבת ה'תרמ"א), פון סאדיגורא.

• הרב יצחק פרידמאן (ב' תשרי ה'תר"י - י"ז אדר ה'תרע"ז), פון באיאן.

• הרב ישראל פרידמאן (כ' שבט ה'תרי"ב - י"ג תשרי ה'תרס"ז), פון סאדיגורא.

• מרת הדסה פייגא (פייגא'לע) ( - י"א תשרי ה'תרצ"ב), די ווייב פון הרב אבי עזרא זעליג שפירא (ה'תקצ"ו (אומגעפער) - י"ט מנחם אב ה'תרמ"ה), א זון פון דער שרף פון מאגלניצא

• מרת פערל'ה, די ווייב פון הרב מנחם נחום דוב בער פרידמאן (ה'תר"ג - כ"ז מנחם אב ה'תרמ"ג), פון סאדיגורא.

• מרת שרה רבקה ( - כ"ה סיון ה'תרמ"ז), די ווייב פון הרב ישראל שלום יוסף העשל (חשוון ה'תרי"ג - כ"ט מנחם אב ה'תרע"א), פון מעזשיביזש, א זון פון הרב אברהם יהושע העשל, פון מעזשיביזש.

• מרת שבע רוחמה, די ווייב פון הרב ישראל פרידמאן (י' אייר ה'תרי"ד - י"ג כסלו ה'תרצ"ד), פון טשארטקאוו.

זעט אויך

• רוזשין (הויף)
• סאדיגורא (הויף)

רעפערענצן

• אנציקלופדיה לחכמי גליציה, מאיר וונדר
• נר ישראל ח"ו בערכו (4)