לי עוועניו
ליע עוועניו (ענגליש: Lee Avenue) איז א הויפט גאס אין דער חרידישער געגנט פון וויליאמסבורג, ברוקלין, ניו יארק סיטי. זי איז איינע פון די הויפט געשעפטס גאסן פונעם וויליאמסבורגער חרידישן אידנטום,זייענדיג די מיטלסטע עוועניו פון די פינף עוועניוס וואס לויפן אדורך אלט וויליאמסבורג און אויף דער גאס און אין די ארומיגע גאסן געפינען זיך א גרויסע צאל אידישע געשעפטן, מוסדות, בתי מדרשים און אנדערע געמיינדע אינסטיטוציעס.
ליע עוועניו הייבט זיך אן ביי קליימער סטריט, נעבן דעם געגנט פונעם וויליאמסבורג בריק, און לויפט צפון אדורך דעם צענטראלן טייל פון וויליאמסבורג. ביי פלאשינג עוועניו טוישט זי נאמען צו נאסטראנד עוועניו, וועלכע לויפט ווייטער דרום אדורך גרויסע טיילן פון ברוקלין.
מקור פונעם נאמען
[רעדאַקטירן | רעדאַקטירן קוואַלטעקסט]ליע עוועניו איז געהייסן לכבוד צוויי אמעריקאנער פאטראטן פון דער תקופה פון דער אמעריקאנער רעוואלוציע:
ריטשארד הענרי ליע (Richard Henry Lee; 1732–1794)
און זיין ברידער פראנסיס לייטפוט ליע (Francis Lightfoot Lee; 1734–1797).
ביידע זענען געווען פון ווירדזשיניע און האבן אונטערגעשריבן די אמעריקאנער אומאפהענגיקייט דעקלאראציע פון יאר 1776. ריטשארד הענרי ליע איז אויך באקאנט פאר'ן פארשלאג וואס ער האט אריינגעגעבן צום קאנטינענטאלן קאנגרעס אין יוני 1776, אז די בריטישע קאלאניעס זאלן דערקלערן זייער פולשטענדיגע אומאפהענגיקייט פון גרויסבריטאניע.
דער נאמען פון ליע עוועניו איז דעריבער נישט פארבונדן מיט דעם קאנסעדעראטן גענעראל ראבערט אי. ליע. אין ברוקלין האט טאקע עקזיסטירט אן אנדער גאס, General Lee Avenue, אין פארט העמילטאן, וועלכע איז געווען געהייסן נאך אים און איז שפעטער געטוישט געווארן צו John Warren Avenue. דאס איז אבער א באזונדערע גאס און האט נישט קיין פארבינדונג מיט ליע עוועניו אין וויליאמסבורג.
היסטאריע
[רעדאַקטירן | רעדאַקטירן קוואַלטעקסט]די אנטוויקלונג פון וויליאמסבורג
[רעדאַקטירן | רעדאַקטירן קוואַלטעקסט]דער געגנט וואו ליע עוועניו געפינט זיך איז אין דעם 19טן יארהונדערט געווען א טייל פון דעם שנעל וואקסנדיגן וויליאמסבורג. וויליאמסבורג, וואס איז ערשט געווען א באזונדערע שטעטל און שפעטער א באזונדערע שטאט, האט זיך אין יענע יארן אנטוויקלט פון א קלענערער באזעצונג צו אן אינדוסטריעלן און באוואוינטן צענטער.
די נאנטקייט צום איסט ריווער און די פארבינדונגען מיט מענהעטן האבן געברענגט א שטארקן וואוקס פון באפעלקערונג און אינדוסטריע. נייע גאסן זענען אויסגעלייגט געווארן, און דער געגנט איז געווארן באוואוינט דורך פארשידענע גרופעס פון איינוואנדערער און ארבעטער.
ליע עוועניו איז געווארן א טייל פון דעם אנטוויקלנדיגן גאסן נעץ פון וויליאמסבורג. שוין אין די מיטל פון דעם 19טן יארהונדערט זענען אויפן גאס און אין איר אומגעגנט געווען פארשידענע געשעפטן און אינדוסטריעלע אונטערנעמונגען.
די פריע יארן
[רעדאַקטירן | רעדאַקטירן קוואַלטעקסט]אין די 19טע יארן האט דער געגנט ארום ליע עוועניו געהאט א פארשידנארטיגע באפעלקערונג. וויליאמסבורג איז געווען איינער פון די שנעלסט וואקסנדיגע טיילן פון ברוקלין, און אויף אירע גאסן האבן זיך געמישט וואוינונגען, פאבריקן, געשעפטן, שולן און אנדערע אינסטיטוציעס.
די פריע געשיכטע פון ליע עוועניו שפיגלט אפ דעם כאראקטער פון וויליאמסבורג אין יענער תקופה, ווען די געגנט איז געווען א געמיש פון וואוינונגען, האנדל, אינדוסטריע און פארוויילונג.
דער וויליאמסבורגער בריק
[רעדאַקטירן | רעדאַקטירן קוואַלטעקסט]א וויכטיגע פאזע אין דער אנטוויקלונג פון דער געגנט איז געווען די עפענונג פונעם וויליאמסבורג בריק אין יאר 1903. דער בריק האט פארבונדן וויליאמסבורג דירעקט מיט מענהעטן און האט שטארק פארגרעסערט דעם פארקער און די צוטריטלעכקייט פון דער געגנט.
די נאנטקייט פון ליע עוועניו צום ברידזש האט געמאכט דעם געגנט א וויכטיגן דורכגאנג צווישן דעם מערב טייל פון וויליאמסבורג און די אנדערע טיילן פון ברוקלין. מיט דער צייט האט די געגנט ווייטער געוואקסן און זיך געטוישט לויט די באדערפענישן פון די באפעלקערונג.
דער וואוקס פון דער אידישער באפעלקערונג
[רעדאַקטירן | רעדאַקטירן קוואַלטעקסט]אידישע איינוואנדערער האבן שוין אין די שפעטע 19טע און פריע 20סטע יארן געשפילט א וויכטיגע ראלע אין וויליאמסבורג. במשך פון די יארן האט זיך די אידישע באפעלקערונג שטארק פארגרעסערט, און עס זענען אויפגעקומען שולן, געשעפטן, ארבייטער פאראייניגונגען און אנדערע אידישע אינסטיטוציעס.
נאך דעם צווייטער וועלט קריג האט זיך דער כאראקטער פון דעם דרום וויליאמסבורגער געגנט שטארק געטוישט. גרויסע צאלן חרידישע אידן און חורבן איבערלעבער, וועלכע זענען געקומען קיין אמעריקע פון אייראפע, האבן זיך באזעצט אין וויליאמסבורג.
געאגראפיע און פארלויף
[רעדאַקטירן | רעדאַקטירן קוואַלטעקסט]ליע עוועניו הייבט זיך אן ביי קליימער סטריט. פון דארט לויפט די עוועניו דרום אדורך דעם צענטראלן טייל פון דער חרידישער געגנט.
די גאס שניידט אדורך א צאל וויכטיגע גאסן פון וויליאמסבורג און פארבינדט פארשידענע וואוינונג און געשעפטס געגנטן.
ביי פלאשינג עוועניו טוישט זיך דער נאמען פון דער גאס צו נאסטראנד עוועניו. נאסטראנד עוועניו לויפט פון דארט ווייטער דרום אדורך ברוקלין.
מוסדות און געמיינדע לעבן
[רעדאַקטירן | רעדאַקטירן קוואַלטעקסט]ליע עוועניו און די ארומיגע גאסן זענען א וויכטיגער צענטער פון חרידישן געמיינדע לעבן. אין דער געגנט געפינען זיך בתי מדרשים, ישיבות, תלמודי תורה, מיידל שולן און אנדערע מוסדות.
נאנט צום אנהייב פון ליע עוועניו ביי קלעימער סטריט געפינען זיך די וויזניצער מאטעלע מוסדות און בית המדרש.
טראנספארטאציע און טראפיק
[רעדאַקטירן | רעדאַקטירן קוואַלטעקסט]צוליב איר נאנטקייט צום וויליאמסבורגער ברידזש איז ליע עוועניו א טייל פונעם וויכטיגן טראנספארטאציע נעץ פון וויליאמסבורג.
דער וויליאמסבורגער בריק פארבינדט ברוקלין מיט מענהעטן, און דער טראפיק ארום דעם בריק האט א השפעה אויף די גאסן פון דעם דרומדיגן טייל פון וויליאמסבורג.
אויף געוויסע טיילן פון ליע עוועניו זענען איינגעשטעלט פארקירונג באגרעניצונגען אין די נאכמיטאג שעות, צווישן 4 און 7 אזייגער, אלס טייל פון די טראפיק רעגולאציעס אין דער געגנט.