נייטרא יישוב

נייטרא יישוב איז א יישוב געגרינדעט געווארן דורך רבי מיכאל בער ווייסמאנדל אלס א רעזידענט פאר דער נייטרא ישיבה מיט אירע תלמידים און רביים און מאנשאפט. דערנאך וואס זיין שוואגער רבי שלום משה הלוי אונגאר האט ערעפנט די ישיבה אין נייטרא אין אייראפע נאכן גרויזאמען חורבן אייראפע, האט רבי מיכאל בער שטארק געארבעט אז די ישיבה זאל קומען אויף אמעריקא, און ער האט זיך אונטערגענומען דאס ווידער ערעפענען און דאס ארויסקומען קיין אמעריקע. לכתחילה האט ער געהאט אויפגעשטעלט די ישיבה מיט דעם יישוב אין סאמערוויל, נוי דזשערסי, אבער עס האט זיך נישט אויסגעארבעט און ער האט תיכף נאכן ערשטן יאר געמוזט זוכן א צווייטן פלאץ, און ער האט געטראפן א רענטש וואס איז געשטאנען צום פארקויפן פון דער ברוסטער פילאנטראפישע פאמיליע, אין דעם שטעטל מאונט קיסקא אפסטעיט נוי יארק, וואס די ישיבה האט זיך תיכף אהינגעצויגן און עקזיסטירט נאך דארטן ביזן היינטיגן טאג, איבער זעכציג יאר שפעטער.

דער יישוב היינט צו טאג

נאך דער פטירה פון הרב שלום משה הלוי אונגאר, האט איבערגענומען דאס נייטרא רבנות זיין זון הרב שמואל דוד הלוי אונגאר. און ער פירט ווייטער די בארימטע נייטרא ישיבה וואס געפינט זיך דארט אין יישוב.

ווי אויך איז משמש בדיינות הרב הלל וויינבערגער, איידעם פון הרב שלום משה הלוי אונגאר און אנפירער פון דער התאחדות הרבנים כשרות אפטיילונג.

עס וואוינען אין נייטרא יישוב היינט צו טאג קרוב צו אכציג משפחות. עס איז פאראן א ביהמ"ד, ישיבה קטנה, ישיבה גדולה, תלמוד תורה "בית יחיאל", מיידל שולע "בית מרים לאה", מקוה טהרה, שפייזקראם, און הצלה.